Э.Номин-Эрдэнэ, Х.Энхсайхан нарыг цагаатгасан шийдвэрийг хүчингүй болгов

Бусдын гарт онц хэрцгийгээр амиа алдсан Ч.Шинэсаран охины хэрэгтэй холбогдуулан Монгол Улсын Дээд шүүхийн Хяналтын шатны шүүх өнөөдөр хэлэлцэж, албан ёсны шийдвэрээ танилцууллаа.

Шүүгчийн тогтоол “Хяналтын шатны шүүхээс Давгадоржийн үйлдсэн онц харгис, хэрцгий аргаар өөртөө эдийн ашигтай давуу байдал бий болгох, хохирогчийг биеэ хамгаалж чадахгүйг мэдсээр байж хоёр хүн хөнөөсөн, мөн 16 насанд хүрээгүй хүнтэй бэлгийн харилцаанд орсон, бусдыг тодорхой үйлдэл хийхийг шаардаж өөрт нь хүчирхийлэл хэрэглэхээр заналхийлсэн, бусдын эд хөрөнгийг хуурч, бодит байдлыг нуух замаар залилах гэмт хэрэг үйлдсэн талаар хоёр шатны шүүхээс ирсэн шийдвэр хууль ёсны бөгөөд үнэмлэхүй байх хуулийн шаардлага хангасан байна. Харин Эрүүгийн хуулийн тусгай ангийн 17.3.3-т зааснаар залилах гэмт хэргийг байнга үйлдэж, амьдралын эх үүсвэрээ болгосон гэж хүндрүүлэх шинжээр зүйлчилж ирснийг өөрчилж энгийн бүрэлдэхүүнтэй болгох нь зүйтэй гэж хяналтын шатны шүүхээс дүгнэлээ. Хоёр шатны шүүх шүүгдэгч Ган-Эрдэнэд гэмт хэргийн шинжгүй бол хэргийг цагаатгаж шийдвэрлэсэн нь хэргийн нөхцөл байдалтай тохирсон байна. Эрүүгийн хуулийг гэмт хэргийн шинжгүй талаар дүгнэсэн дүгнэлт хуулийг зөв тайлбарлаж хэрэглэсэн байна гэж Ган-Эрдэнэд холбогдох шийдвэрийг хэвээр үлдээж шийдвэрлэлээ.

Харин Давгадоржид оноосон ялыг Эрүүгийн хуулийн тусгай ангийн 17.3.3-т заасан ялын зүйлчлэлийг 17.3.1 дэх хэсэгт зааснаар хоёр жил хорих ял болгон өөрчилж, Эрүүгийн хуулийн ерөнхий ангийн 6.8-д зааснаар нэмж, нэгтгэн бүх насаар нь хорих ялаар тогтоож шийдвэрлэлээ.

Цагаадсан этгээд Номин-Эрдэнийн тухайд бол прокуророос түүнийг хүнийг алах гэмт хэрэгт хамжигчаар оролцсон гэж зүйлчилж ирүүлснийг хоёр шатны шүүх гэмт хэргийн бүрэлдэхүүний шинжгүй үндэслэлээр хэргийг хэрэгсэхгүй болгож шийдвэрлэсэн. Энэ талаар хийсэн дүгнэлт хэргийн жинхэнэ байдалтай нийцээгүй, хэрэглэвэл зохих хуулийг хэрэглээгүй гэж Хяналтын шатны шүүхээс үзлээ. Өөрөөр хэлбэл, Номин-Эрдэнэ гэмт үйлдэлд Эрүүгийн хуулийн тусгай ангийн 15.2-т заасан буюу амь нас, эрүүл мэндэд нь аюултай нөхцөл байдал үүссэн байхад тусламж үзүүлэхгүй байгаа нь эс үйлдэхүйд нь тухайн гэмт хэргийн шинжийг агуулж байгаа эсэхэд дүгнэлт хийгээгүй орхигдуулсанд буруу байна. Хяналтын шатны шүүхээс энэ талаар нөхөн дүгнэлт хийх боломжгүй учраас Номин-Эрдэнэд холбогдох шийтгэх тогтоол, магадлалд холбогдох заалтуудыг хүчингүй болгож шийдвэрлэлээ.

Мөн Энхсайханд холбогдох хэрэгт хоёр шатны шүүх дүгнэлт хийхдээ хэрэгт авагдсан нотлох баримтыг болон хууль зүйн дүгнэлтийн талаар дүгнэлт хийсэн байна. Прокуророос 16 насанд хүрээгүй хүүхэдтэй бэлгийн харилцаанд орсон үйлдэлд хамжигчаар оролцсон гэж яллах дүгнэлт үйлдэж ирүүлсэн байхад үйл баримтыг буруу тогтоож хуулийг буруу хэрэглэсэн учраас мөн Энхсайханд холбогдох хэргийг шийтгэх тогтоол, магадлалд холбогдох заалтуудыг хүчингүй болгож шийдвэрлэлээ.

Энхсайхан, Номин-Эрдэнэ нарт холбогдох заалтыг хүчингүй болгосонтой холбогдуулж тэдгээрт хувийн баталгаа гаргах, таслан сэргийлэх арга хэмжээг авч байна.