Jade Gas: 1.1 тэрбум австрали долларын санхүүжилтийн эцсийн гэрээг есдүгээр сард байгуулбал Тавантолгойн метан хийн үйлдвэрлэлийн өрөмдлөгийг 2027 онд эхлүүлнэ

Австралийн хөрөнгийн биржид бүртгэлтэй Jade Gas Holdings компани Монгол дахь Тавантолгойн нүүрсний давхаргын метан хийн төслийн эхний шатанд шаардлагатай 1.1 тэрбум австрали долларын хөрөнгө оруулалтын урьдчилсан хэлэлцээр байгуулж, эцсийн гэрээг энэ оны гуравдугаар улиралд багтаан байгуулахаар ажиллаж байгаагаа мэдэгдсэн талаар гадаадын хэвлэл мэдээллийн сайтууд мэдээлж эхэлжээ. 

Jade Gas Holdings (ASX) нь БНХАУ-ын PT Beijing Energy Linking (PTBEL) тэргүүтэй, PetroChina болон Hunan Geology & Mining Technology Co. Ltd компаниудын бүрэлдэхүүнтэй консорциумтай хамтын ажиллагааны урьдчилсан (non-binding) хэлэлцээр байгуулжээ. Энэхүү хэлэлцээр нь Монгол Улсын Өмнөговь аймаг дахь Тавантолгойн нүүрсний давхаргын метан хийн төслийн Red Lake хөгжүүлэлтийн эхний шатны санхүүжилтийг шийдвэрлэх зорилготой юм.

Тус компанийн мэдээлснээр эхний шатанд нийт 175 үйлдвэрлэлийн цооног өрөмдөж, олборлолтын талбайн дэд бүтэц, авто зам, холбоо, усны байгууламж, эрчим хүчний шийдэл, мөн шингэрүүлсэн байгалийн хий (LNG) боловсруулах үйлдвэрийг байгуулахаар төлөвлөжээ. Эдгээр бүтээн байгуулалтын нийт хөрөнгө оруулалтыг 762.5 сая ам.доллар буюу 1.1 тэрбум австрали доллар гэж тооцоолжээ. 

Jade Gas-ийн Гүйцэтгэх захирал Жо Бёрк (Joe Burke) мэдэгдэлдээ:

"PTBEL, PetroChina болон Hunan зэрэг нүүрсний давхаргын метан хийн олборлолтын арвин туршлагатай байгууллагуудтай хамтран ажиллах болсон нь Red Lake төслийг өмнө нь боломжгүй байсан хурд, цар хүрээгээр хөгжүүлэх нөхцөлийг бүрдүүлж байна. Энэхүү хамтын ажиллагаа нь Монголын байгалийн хийг зах зээлд гаргаж, дизель түлшийг орлох, LNG нийлүүлэлтийг нэмэгдүүлэх бодит боломжийг нээж байна" хэмээн онцолжээ.

Харин компанийн албан мэдэгдэлд хамгийн чухал нөхцөлийг тодотгосон байна. Одоогийн байгуулсан баримт бичиг нь хууль эрх зүйн хувьд хүчин төгөлдөр эцсийн санхүүжилтийн гэрээ биш бөгөөд хамтын ажиллагааны үндсэн зарчмыг тохирсон урьдчилсан хэлэлцээр юм. Талууд нарийвчилсан нөхцөл, техникийн болон санхүүгийн шалгалтыг дуусгасны дараа 2026 оны есдүгээр сарын эцэс гэхэд эцсийн (binding) гэрээг байгуулахаар зорьж байна. Одоогоор ямар нэгэн хөрөнгө шууд шилжүүлсэн, эсвэл санхүүжилт бүрэн баталгаажсан гэж үзэх боломжгүй болохыг компани онцолжээ.

Хэрэв эцсийн гэрээ хугацаандаа байгуулагдвал PTBEL консорциум 10 хүртэлх өрмийн төхөөрөмжийг Монголд татан төвлөрүүлж, 2027 оны хоёрдугаар сараас гуравдугаар сарын хооронд үйлдвэрлэлийн хэмжээний өрөмдлөгийг эхлүүлэхээр төлөвлөсөн байна.

Red Lake нь Jade Gas-ийн хэрэгжүүлж буй Тавантолгойн нүүрсний давхаргын метан хийн төслийн гол хөгжүүлэлтийн бүс бөгөөд нийт 60 км² талбайг хамардаг. Энэ нь компанийн эзэмшдэг 665 км² зөвшөөрлийн талбайн нэг хэсэг юм. Компанийн үзэж буйгаар уг төсөл ашиглалтад орсноор Монгол Улсад олборлосон байгалийн хийг уул уурхай, хүнд даацын тээвэр, аж үйлдвэрийн салбарт нийлүүлж, импортын дизель түлшний хэрэглээг бууруулах стратегийн ач холбогдолтой төсөл болох юм.