Шүүхэд сэвэлзсэн салхи ба Ц.Цогтыг дэмжсэний цаана...

Сүүлийн нэг сард Дээд шүүхийн ерөнхий шүүгчээр бүгд амьсгаллаа. Дээд шүүх Д.Ганзориг гэдэг хаантай болчихсон, тэр нь дахиж зургаан жил суучих гээд шүүхийнхнийг, хуулийнхныг, тэр бүү хэл ард нийтийг ч амраасангүй сандаргалаа. Цэц тэр тоглолтод нь оролцож. Дээд шүүхийн ерөнхий шүүгч дахиад зургаан жилээр сонгогдож болно гэж шийдэв. Тэр нь Цэцийн нэрийг газарт булав. Гэсэн нь Цэцийн шийдвэр Д.Ганзоригт нэмэр болсонгүй. Уул нь: Д.Ганзориг энэ удаад найз Ч.Хосбаярыгаа ерөнхий шүүгч болгоод, дараа жил 60 хүрч тэтгэвэрт гарахаар нь буцаж ерөнхий шүүгч болох тохироо хийж.

Тэр хүртэл нь: Ч.Хосбаяраар Н.Алтанхуягийг ялтай болгох мэт цэвэрлэгээ хийлгэж, өөрөө нэр усаа цэвэрлэж угаагаад ирэх гэж байж. Гэтэл нь Дээд шүүхийн шүүгч нарын хуралдаанаар байдал өөр болоод явчихаж. Шүүгч нар Ч.Хосбаяртай өрсөлдүүлээд Ц.Цогтыг нэр дэвшүүлж. Ц.Цогт болбоос шүүх байтугай хуулийн салбартаа мэргэжилдээ хайртай, шударга гэдгээрээ зартай. Найраа мэддэггүй, нам байхгүй тийм шүүгч. Эдүгээг хүртэл Арслантай гүүрний урдхантай байдаг шүүхийнхний байранд амьдардаг гэхээр авлигаас ангид гэдэг шулуухан ойлгогдоно. Ерөнхий шүүгчээр томилуулахын тулд ирээдүйгээ нугасласан янз бүрийн амлалт өгч балрахгүй бол яг өнөөдөр бол Дээд шүүхэд Ц.Цогтоос өөр шударга сонголт байхгүй. Бодох нь ээ: Дээд шүүхийнхний ерөнхий шүүгчээ тодруулсан хурлын дүн их сонин юм хэлж байх шиг. 22 шүүгчээс 11 нь Ц.Цогтыг, хоёр нь Ч.Хосбаярыг дэмжжээ. Үлдсэн ес нь цагаан хуудас өгчээ. Ц.Цогт, Ч.Хосбаяр хоёрт очсон санал бол Дээд шүүхийн шүүгч нар шударга ёсыг хүсэж эхэлснийг илэрхийлнэ. Хамаг учир нь: Шүүгч нар 21 оны Ерөнхийлөгчийн сонгуулиар үзэгдсэн шиг цагаан хуудас хэрэглэсэн нь шударга ёсны хүсэмжлэл болон шударга бусыг эсэргүүцсэний дээд хэлбэр. Ерөөс: Д.Ганзоригийн үед шүүх улс төрөөс бүрэн хамааралтай, Нарийн бичгийн даргын үгээр хөдөлдөг, шүүгч нараа томилж чадахгүй, тангараг өргүүлж барахгүй болсон. Сүүл хавь руугаа Цэцтэй хуйвалдсан, басхүү Д.Ганзориг ерөнхий шүүгч биш зүгээр л Д.Ганзориг байсан.

Эдүгээ ерөнхий шүүгчийнх нь бүрэн эрх дууссан Д.Ганзоригийг авах Танхим тодорч өгөхгүй, өөрөө: Намайг авах Танхим байна уу, Эрүүгийн танхимдаа очно гэвэл болох уу гэж гуйж буй гэнэ. Базах нээ: Шүүхэд шударгын салхи сэвэлзэж, Дээд шүүхийн шүүгч нар: Шүүх бол бие даасан институци юм гэж чанга дуугаар зарлалаа...

Ө.БАТБИЛЭГ

ӨДРИЙН СОНИН